Saturday, June 19, 2010

The Triduum as it was in the Church of Rome: Holy Thursday from the Gelasian Sacramentary, Part 2

(Part 1 here)

RECONCILIATIO POENITENTIS AD MORTEM.

Deus misericors, Deus clemens, qui secundum multitudinem miserationum tuarum peccata poenitentium deles, et praeteritorum criminum culpas venia remissionis evacuas, respice super hunc famulum tuum et remissionem sibi omnium peccatorum tota cordis confessione poscentem deprecatus exaudi. Renova in eo, piissime Pater, quicquid terrena fragilitate corruptum est vel quicquid diabolica fraude violatum est: in unitatem corporis ecclesiae tuae membrum, perfecta remissione restitue: miserere, Domine gemituum, miserere lacrimarum, et non habentem fiduciam, nisi in tua misericordia, ad sacramentum reconciliationis admitte: Per.
Maiestatem tuam, Domine, supplices deprecamur, ut huic famulo tuo, longo squalore poenitentiae macerato, miserationis tuae veniam largire digneris, ut nuptiale veste recepta, ad regalem mensam unde eiectus fuerat mereatur intrare. Per.



Maiestatem tuam quaesumus, Domine, sanctae Pater omnipotens, aeterne Deus, qui non mortem sed peccatorum vitam semper inquiris, respice flentem famulum tuum, attende prostratum, eiusque planctum in gaudium tua miseratione concede. Scinde delictorum saccum, et indue eum laetitiam salutarem, ut post longa peregrinationis fame[m] de sanctis altaribus tuis satietur: ingressus cubiculum Regis, in ipsius aula benedicat nomen gloriae tuae semper. Per Dominum.

Deus misericors, Deus clemens, qui indulgentiam tuam nulla temporum lege concludis, sed pulsantis misericordiae tuae ianuam aperis, poenitentes etiam sub ipso vitae huius terminum non relinquis. Respice propitius super hunc famulum tuum, remissionem sibi omnium peccatorum tota cordis confessione poscentem. Renova in eo, piissime Pater, quod actione, quod verbo, quod ipsa denique cogitatione diabolica fraude vitiatum est, et unitati corporis ecclesiae membrum tuae redemptionis annecte. Miserere gemituum, miserere lacrimarum, et non habentem fiduciam, nisi in misericordia tua, ad sacramentum reconciliationis admitte, quia nullus animae in hoc corpore constitutae difficilis apud te, aut tarda curatio est. Fidelis enim es in verbis tuis, qui conversum peccatorem non longa temporum spatia differendum, sed mox ut in te gemuisset dixisti esse [audiendum?]. Per.

Oratio post reconciliationem, vel posteaquam communicaverit.

Deus qui confitentium tibi corda purificas, et accusantes se conscientias ab omni vinculo iniquitatis absolvis, da indulgentiam reis et medicinam tribue vulneratis, ut percepta remissionem omnium peccatorum in sacramentis tuis sincera deinceps devotione permaneat, et nullum redemptionis aeternae susteneat detrimentum. Per.

[Post haec offert plebs, et confitiuntur sacramenta.]

Secreta.
Virtutum caelestium Deus, de cuius gratiae rore discendit ut ad mysteria tua purgatis sensibus accedamus: praesta, quaesumus, ut in eorum traditione solemniter honorum tibi placitum deferimus obsequium. Per.

Infra actionem.
Communicantes, et diem sacratissimum celebrantes quo traditus est Dominus noster Iesus Christus. Sed et memoriam...

Item infra.
Hanc igitur oblationem, Domine, cunctae familiae tuae, quam tibi offerunt ob die ieiunii cenae Dominicae, in qua Dominus noster Iesus Christus tradidit discipulis suis corporis et sanguinis sui mysteria caelebranda, quaesumus, Domine, placatus intende, ut per multa curricula annorum salva et incolumis munera sua tibi Domine mereatur offerre: diesque nostros in tua pace d[isponas].

Item infra canone[m], ubi dicimus Qui pridie quam pateretur, in huius diei processione dicimus Qui ac die antequam traderetur, accepit panem in suis sanctis manibus, elevatis...

Postcommun.
Concede, quaesumus, Domine, ut percepti novi sacramenti mysterium et corpore sentiamus et mente. Per.

[Ad populum.]
Gregem tuum, Pastor bone, placatus intende, et oves, quas pretioso sanguine Filii tui redemisti, diabolica non sinas incursione lacerari. Per Dominum.

No comments: